ILOILO CITY- Wala sa gihapon makilal-an ang driver sang salakyan nga nagbunggo sa isa ka restaurant sa Valeria St., Iloilo City Proper.
Natabo ang insidente kahapon sang kaagahon.
Base sa kuha sang close circuit television camera sang restaurant, puti nga SUV ang nagbunggo kun sa diin gilayon nga ginpaatras sang driver ang salakyan kag madasig nga ginpadalagan kag nagpalagyo.
Sa interview sang Bombo Radyo kay Michelle Ng, management coordinator sang restaurant, iya ginpahayag nga wasak gid ang crystal nga dingding, naguba man ang railings, mga lamesa kag pulungkuan, amo man ang aircon unit kag portion sang comfort room.
Suno kay Ng, posible nga hubog ang driver sang salakyan kag base sa kuha sang close circuit television sa malapit nga establishments, madasig ang dalagan sang SUV.
Sa subong, ginatinguhaan pa nila paagi sa bulig sang otoridad nga ma-identify ang plate number sang salakyan agud mahapos nga matumod ang tag-iya sini.
