ILOILO CITY- Naglab-ot sa 100 ka campaign materials ang napangkakas sang Commission on Elections sa una nga adlaw sang Oplan Baklas sa Iloilo City.
Sa interview sang Bombo Radyo kay Mr. Jonathan Sayno, Election Assistant II sang Commission on Elections- Iloilo City, iya ginpahayag nga kalabanan sang mga ginpangkakas amo ang mga posters nga nabutang sa indi designated nga common poster areas, amo man ang nakabutang sa public structures, mga poste sang kuryente kag sa mga kahoy.
Suno kay Sanyo, una nila nga ginkadtuan amo ang mga barangay sa Molo nga ginalakipan sang Boulevard, San Juan, kag Calumpang.
Ginpadulungan man nila ang barangay Calaparan, Sto Niño Sur, Sto Niño Norte kag Sta Cruz sa Arevalo.
Pahayag ni Sayno, ini nga mga barangay ang una nila ginkadtuan bangud madamo diri sang mga botante.
Dugang ni Sayno, ang ginpangkakas nga election materials ang ila tipunon kag iga-itemize agud magamit nga ebidensya sa tion nga may ipasaka nga kaso batok sa mga kandidato nga nagapanag-iya sini.
