Bangud desperado na nga makakaon, makainom, kag makakuha sang disente nga mga gamit, ginsulod sang linibo ka mga tawo ang mga warehouse sa Gaza kun sa diin nakatago ang mga ayuda lakip na ang mga harina kag basic hygiene products kaangay sang habon.
Suno sa United Nations Relief and Works Agency (UNRWA), ang “break-ins” sa mga warehouse ang makabig nga makahalangawa nga senyales nga nagakadula na ang civil order sa Gaza bangud sa gyera sa tunga sang Israel kag Hamas militants.
Photo: Ahmad Hasaballah/Getty Images
“People are scared, frustrated and desperate,” kabahin sang statement.
Ang UNRWA amo ang nagahatag sang basic services sa ginatos kag linibo ka mga residente sa Gaza. Ang mga eskwelahan nga sakop sini sa Gaza ang nahimo na nga ilistaran sang mga Palestinhon nga nawad-an sang puluy-an bangud sa giyera.
Ang sulod sang ila nga warehouse amo ang ayuda nga halin sa Egypt kag ginpasugtan sang Israel nga makaabot sa Palestine.
Sang Sabado suno sa spokesperson sang ahensya nga si Juliette Touma, apat gid ka pasilidad ang ginpang-ransak sang mga tawo.
Gindugang sang ahensya nga wala sang fuel sa amo nga warehouses nga amo ang pinaka-kritikal subong sa Gaza kasunod sang pag-utod sang Israel sang shipment sini nga produkto halin sang ginpaidalom ang amo nga teritoryo sa total siege.
Sa rekord sang UN, nakasaad nga masobra sa tunga sa 2.4 million nga mga residente sa Strip ang na-displace kag linibo naman ka mga building ang naguba halin sang nagtimalos ang Israel sa Hamas kasunod sang Oktubre 7 nga pagpang-atake. #
