Nahimo na nga lulubngan sang linibo ka mga kabataan ang Gaza Strip bangud sa wala-untat nga giyera sa tunga sang Israel kag Hamas militants nga naglawig na sang masobra tatlo ka semana.
Ini ang ginpahayag sang United Nations kadungan sang paandam nga posible magadamo pa gid ang mapatay bangud sa dehydration sa amo nga teritoryo sang Palestine.
Photo by MAHMUD HAMS / AFP
Ini nga statement ang kasunod sang tikang sang Israel nga pagpasangkad pa sang ila nga air kag ground attacks sa Gaza – lakip na sa mga balay kag ospital – bilang kabahin sang ila pagtimalos kag misyon nga pudpudon ang Palestinian group nga Hamas kasunod sang pagpang-atake nga ginhimo sang militante nga grupo sa southern Israel sang Oktubre 7 nga nagpatay sang 1,400 ka mga tawo.
Suno naman sa health ministry sa Gaza, lapaw na sa 8,500 ka Palestinians — kalabanan amo ang kabataan kag kababainhan — ang napatay bangud sa balos sang Israel.
“Our gravest fears about the reported numbers of children killed becoming dozens, then hundreds, and ultimately thousands were realised in just a fortnight,” kabahin sang statement ni James Elder, ang spokesperson sang United Nations Children’s Fund (UNICEF). “The numbers are appalling; reportedly more than 3,450 children killed; staggeringly this rises significantly every day.”
Pahayag pa sini: “Gaza has become a graveyard for thousands of children. It’s a living hell for everyone else.”
Pahayag naman ni Catherine Russell, ang executive director sang UNICEF, ginabanta 6,300 ka mga kabataan sa Gaza ang nasamaran bangud sa apat na ka semana nga Israeli attacks. Buot silingon sini suno sa iya, sa average, 420 ka mga Palestinian nga kabataan ang nagakapatay kag nagakasamaran kada adlaw sa amo nga Strip.
“And if there is no ceasefire, no water, no medicine, and no release of abducted children? Then we hurtle towards even greater horrors afflicting innocent children,” dugang ni Elder.
Base naman sa numero halin sa health faculties sa Gaza, yara sa 940 ka mga kabataan ang missing bangud sa amo nga gyera. #
