Indi na maka-operate ang naga-isahanon nga cancer treatment hospital sa Gaza Strip bangud nawad-an na ini sang fuel sa ikaapat nga semana sang gyera sa tunga sang Israel kag Hamas militants.
Ginkumpirma ini sang director sang Turkish-Palestinian Friendship Hospital nga si Subhi Skaik kag ginsegundahan man ni Palestinian Health Minister Mai al-Kaila.
Photo: Reuters
Suno pa sa statement sang health ministry, nabutang sa alang-alang ang kabuhi sang 70 ka pasyente nga may cancer.
Sa kabug-usan suno pa sa talatapan, 16 na sa 35 ka mga ospital sa Strip ang wala nagagana.
“The number of cancer patients in the Gaza Strip is about 2,000 living in catastrophic health conditions as a result of the ongoing Israeli aggression on the Strip and the displacement of a large number,” pahayag ni al-Kaila.
Oktubre 7 sang gin-atake sang Hamas ang southern Israel nga nagpatay sang 1,400 ka mga tawo. Sunod nga nagtimalos ang Israel paagi sa pagdeklarar sang gyera, pagpaidalom sa Strip sa total siege, pagpatigayon sang air strikes kag ground operation. Suno sa health ministry sa Palestine, 8,796 ka Palestinians lakip na ang 3,648 ka mga kabataan ang napatay bangud sa amo nga pagpang-atake sang Israel.#
