ILOILO CITY- Napirmahan na sang Iloilo City Government sa pagpanguna ni Mayor Jerry Treñas ang P180-Million loan agreement upod sa Development Bank of the Philippines (DBP) para sa pagpatukod sang bag-o nga state-of-the-art Triple A Slaughterhouse.
Sa interview sang Bombo Radyo kay Mayor Treñas, iya ginpahayag nga magluwas sa pagpatukod sang bag-o nga building, magabakal man ang syudad sang bag-o kag moderno nga pasilidad para sa export production.
Suno sa alkalde, sa subong, gina- finalize pa ang design sang bag-o nga slaughterhouse nga sarang mag-akomodar sang 1000 ka baboy kada adlaw nga halos doble sa 500-600 ka baboy kada adlaw.
Dugang niya, sa tion nga matapos ang slaughterhouse, dako gid ang mabulig sini sa revenue sang syudad ilabi na nga isa ang slaughterhouse sa top-earning department sa idalom sang Local Economic Enterprise Office.
