ILOILO CITY- Ginpanginwala sang isa ka Sangguniang Kabataan chairman sa New Lucena, Iloilo nga gin-housing ang mga ini sa sulod sang pila ka adlaw antes ang eleksyon para sa Sangguniang Kabataan Municipal Federation nga ginpatigayon kahapon.
Ini kasunod sang natabo kun sa diin sa kabilugan nga 21 ka Sangguniang Kabataan chairpersons sa banwa sang New Lucena, 10 lamang ang nag-abot sa venue kahapon.
Sa interview sang Bombo Radyo kay Argiel Solano, Sangguniang Kabataan Chairman sang Brgy. Janipaan Oeste, iya ginpahayag nga sa iya nga bahin, wala ini nagtambong sa eleksyon bangud nga may online class ini.
Apang, gin- ako ni Solano nga intensyon nila nga indi magpadulong sa venue sang eleksyon.
Si Solano ang isa sa 11 ka mga chairpersons nga nagpadala sang manifesto nga nagahingyo sang pag- reschedule sang election.
Naplastar sa manifesto nga wala nakatapos sa Sangguniang Kabataan Mandatory training sang Nobyembre 12 bangud sa pressure si Sangguniang Kabataan Chairperson Shiela Mae Belgira kag sang nag-request ini sang special training pagkasunod nga adlaw, wala ini gintugutan.
Santo sa laye, kon ang isa ka Sangguniang Kabataan chairman wala nakakompleto sang mandatory training, indi ini makapungko sa posisyon gani indi man ini makaboto sa Sangguniang Kabataan Municipal Federation election.
Gin-ako man ni Solano nga ang ila ginsuportahan agud mangin Sangguniang Kabataan Federation President amo si Ana Mae Baldeviso sang Brgy. Poblacion.
Samtang, ginkumpirmar naman ni Mayor Liecel Mondejar- Seville nga nadayon ang election pagkatapos nga nakaabot man antes ang alas- singko kahapon ang siyam pa ka Sangguniang Kabataan chairpersons rason nga nakakuha sang majority nga number ang board of canvassers.
