ILOILO CITY- Nagpanawagan si Iloilo Governor Arthur Defensor sa publiko nga indi paghilabtan ang mga Sangguniang Kabataan officials sa ila desisyon ilabi na sa pagpili sang Federation President sa probinsya sang Iloilo.
Sa interview sang Bombo Radyo kay Gov. Defensor, iya ginpahayag nga mas maayo nga makapili ang mga SK officials sang luyag gid nila nga magpungko sa nasambit nga posisyon.
Wala man ginadumilian nga makasugilanon sa mga SK officials ilabi na kun may mga advise nga ginahatag sa mga functions kag obligasyon nila apang sa pagdesisyon, itugyan na lang sang kabataan.
Gina-engganyo naman ni Gov. Defensor ang mga local government units kag mga ginikanan nga hatagan sang ligwa ang mga kabataan nga magpili sang ila luyag.
Nagapati ang natungdan nga makahimo sang intelligent choice ang mga SK officials.
