ILOILO CITY- Nagdeploy ang Iloilo Provincial Government sang mga coasters sa nagkalain-lain nga terminal sa syudad sang Iloilo kadungan sang nationwide transport strike bilang protesta sa tikang sang Land Transportation Franchising and Regulatory Board nga pag- require sang consolidation for registration sang tanan nga public utility vehicles (PUVs) sa masunod nga tuig.
Ini nga deployment ang mandu ni Iloilo Governor Arthur Defensor Jr. sa provincial Civil Defense Operations Center agud nga maakomodar ang mga empleyado sang Provincial Capitol mangin ang riding public nga wala sang may masakyan.
Sa interview sang Bombo Radyo kay Atty. Dennis Ventilacion, head sang Provincial Legal Office, iya ginpahayag nga duha ka mga coasters ang una nga gindeploy para sa mga riding public halin sa Mohon, Ungka kag Tagbak Terminal.
Suno kay Atty. Ventilacion, may mga nag-standby man nga Provincial Civil Defense truck sa Capitol Grounds kun kinahanglan ang dugang nga deployment.
Pahayag niya, indi mapat-od kun tubtob san-o ang deployment sang mga salakyan sang provincial government apang padayon nga gina-monitor sang Operations Center ang sitwasyon sa dalanon samtang nagapadayon ang strike nga magalawig tubtob sa Mierkules.
Dugang sang natungdan, aware na ang mga empleyado sang kapitolyo nga may yara sila sang mahimo masakyan bangud temprano pa napahibalo ang tagsa ka opisina nga may mga iga-deploy nga mga salakyan sa mga terminals.
