Nabun-an sa sulod sang presuhan sa Arizona, USA si Derek Chauvin, isa ka former police officer sa Minneapolis, Minnesota nga kilala nga nagpatay sa Black American nga si George Floyd.
Ginpahayag nga nakaluwas man si Chauvin sa amo nga insidente apang ginsaylo sa ospital agud nga mapadayon ang pagbulong.
Wala na sang iban pa nga preso nga napilasan kadungan sang hitabo.
Matandaan nga sang Abril 2021, na-convict si Chauvin sa kaso nga second-degree unintentional murder, third-degree murder kag second-degree manslaughter.
via CNN
Ginsentensyahan ini sang tubtub 22 ka tuig kag tunga nga pagkapreso.
Nangin bantog ang kaso sang amo nga pulis bangud kun matandaan, sang Mayo 25, 2020, siyam ka minutos sini nga ginluhudan ang liog ni Floyd matapos nga nag-responde ang mga pulis sa report nga naggamit ang biktima sang peke nga $20 sa corner store sa Minneapolis.
Ginposasan pa ang 46-anyos nga biktima sang amo nga tion, ginduot ang nawong sa duta, kag nangin popular man ang sulit-sulit sini nga apelar nga “I can’t breathe.”
Ang amo nga hitabo ang nagpa-igrab sang tuman ka daku nga protesta batok sa racial injustice sa bilog nga Amerika kag mangin sa iban nga pungsod.
