Ginkumpirma ni US President Joe Biden nga ang apat ka tuig nga bata nga babayi nga si Abigal Edan amo ang labing-una nga American hostage nga ginhilway sang Hamas militants halin sang nakasugtan sang grupo kag sang Israel nga magpatigayon sang apat ka adlaw nga ceasefire.
Kabahin si Edan sang 17 ka hostages nga ginbuy-an sang militante nga grupo sa ikatatlo nga adlaw sang truce.
Suno kay Biden, tuman ka daku nga trauma ang gina-agyan sang bata bangud nasaksihan sini kun paano ginpatay sang Hamas ang iya iloy sang Oktubre 7 sang aga sang nagsalakay ang militante nga grupo sa Southern Israel.
Sunod nga nagdalagan ang bata sa iya amay, apang sang ulihi, napatay man ang amay sini bangud gingamit sini ang iya lawas agud matabunan ang iya bata.
Sa subong, yara na ang bata sa Israel apang wala sang detalye nga ginhatag kun kamusta ang kondisyon sini.
Suno pa kay Biden, maga-istorya siya kay Israel Prime Minister Benjamin Netanyahu kag nagalaum nga indi ini ang katapusan sang temporaryo nga ceasefire.
Una na nga ginpahayag ni US national security adviser Jake Sullivan nga 4th birthday pa ni Edan sang nagligad lamang nga adlaw ukon sang tion nga ginabihag pa ini sang Hamas sa Gaza.
Nahibaluan nga pagkatapos sang kumpirmasyon nga na-release na si Edan, may 10 pa ka Americans nga nagapabilin nga missing sa amo nga gyera sa Middle East.
Sa una nga adlaw sang ceasefire, 24 ka hostages ang ginbuy-an (13 ka Israeli kag 11 ka foreign nationals lakip ang isa ka Pinoy caregiver) samtang sa ikaduha nga adlaw naman, 17 ang ginhilway (13 ka Israelis kag apat ka foreign nationals). #
