Sa baylo nga sa St. Peter’s Square magpanguna sa Angelus prayer kaangay sa kinaandan sang mga tumuluo, nagtinir si Pope Francis sa iya ginapuy-an sa Casa Santa Marta kag nagpangayo sang bulig sa isa ka Vatican official agud basahon ang iya nga mensahe.
Suno sa Santo Papa, naga-suprer siya sa lung inflammation kag sa hingapusan sang iya mensahe, naghingyo man ini sa mga tawo nga indi magkalipat nga magpangamuyo man para sa iya.
Nakit-an ang 86-anyos nga Pope nga nagapungko lamang sa chapel, naga-ubo kun kaisa, kag may bandage pa sa iya nga kamot.
Bangud sini, gin-broadcast na lamang sang live ang pangamuyo sa screens sa St Peter’s Square kag gin-stream man sa Vatican News website.
Matandaan nga sang nagligad lamang nga Sabado, nagpa-opistal si Pope Francis sa Roma para sa CT scan.
Sandig sa una nga anunsyo sang Vatican, may gamay nga trangkaso ang Santo Papa apang negatibo ang resulta sa anuman nga risgo sang pulmonary complications.
Wala pa sang paathag ang Vatican kun ngaa may kinalain sa anunsyo sini ipaanggid sa ginkumpirma ni Pope Francis nga may yara siya sang lung inflammation.
Nahibaluan nga ginkuha ang isa sa lungs sang Santo Papa sang bataon pa lamang ini kag nagatinir pa lamang sa Argentina.
Bangud sa kondisyon ni Pope, si Father Paolo Braida ang nagbasa sang iya mensahe lakip na ang apelar sa kalinong sa Ukraine, pagpasalamat sa ceasefire sa Gaza, kag kumpirmasyon sa intensyon sang Santo Papa nga magbyahe sa Dubai sa Disyembre 1 agud magtambong sa UN climate change conference.
Sa iya traditional closing remarks, pahayag sini: “I wish everyone a good Sunday. Please do not forget to pray for me. Have a good lunch and see you next time.”
Nahibaluan nga antes sini nga kondisyon sang Santo Papa, siyam man ini ka adlaw sa ospital sang Hunyo bangud sa iya nga abdominal hernia, apang naka-recover naman sa amo nga operasyon.#
