ILOILO CITY- Tatlo ka mga tawo ang pilason matapos nagtumpilak ang ila ginasakyan nga motorsiklo matapos nakabunggo sa isa ka pick- up truck sa Bangga Dawis, New Lucena, Iloilo.
Ang mga biktima amo sanday alyas Reniel,31,sang Dasal, Sibunag, Guimaras kag amo ang driver, kag mga angkas nga sanday alyas Alvin, 33, residente sang Dasal, Sibunag, Guimaras, kag alyas Rj, 34, sang Poblacion South East Zone, Lemery.
Ginapahayag nga madasig ang dalagan sang motorsiklo.
Sa interview sang Bombo Radyo kay Ariane Pedroso, trabahante sa isa ka balaligyaan sa lugar kag nakakita sa aksidente, iya ginpahayag nga sa atubang gid sang ila pwesto nagtupa ang motorsiklo.
Suno kay Pedroso, lipong ang mga sakay sang motorsiklo bangud sa impact sang pagkabunggo kag pagkatumpilak.
Dugang niya, sang nagkalayo ang motorsiklo, nalab-ot pa ang buhok sang isa nila ka customer.
Ginpangdala naman sa ospital ang mga biktima.
Samtang, nagdepensa ang driver sang pick -up nga mahinay ang dalagan sini sang nabungguan sang motorsiklo sa Bangga Dawis, New Lucena, Iloilo.
Sa interview sang Bombo Radyo kay Renato Clavero, residente sang Tagbac, Jaro, Iloilo City, iya ginpahayag nga sang nagatabok ang ila pick- up sa dala, natalupangdan sang iya upod sa salakyan nga may nagapadulong nga motorsiklo nga madasig ang dalagan gani nagpreno si Clavero apang nalab- ot gid sang motorsiklo ang pick -up.
Sa interview naman sang Bombo Radyo kay PCaptain Rogie Panela, Officer in Charge sang New Lucena Municipal Police Station, iya ginpahayag nga base sa inisyal nila nga pagpangusisa, nagapanimaho sang makahulubog nga ilimnon ang mga biktima.
Nakaangkon naman sang kapilasan kag mga paso sa lawas ang tatlo kag gin-refer sa ospital sa syudad.
