Magapakig-angot si Vice President Sara Duterte sa Department of Justice (DOJ) agud isaad ang iya panindugan nga indi dapat magkooperar ang Pilipinas sa International Criminal Court (ICC) sa imbestigasyon sini sa kontrobersyal nga war on drugs sa idalom sang administrasyon sang amay sang bise-presidente nga si former President Rodrigo Duterte.
Suno kay VP Duterte, iplastar niya ang legal nga mga basehan sang iya nga panindugan.
Sang nagligad nga adlaw, matandaan nga nagpahayag si President Ferdinand Marcos Jr. nga ginatun-an sang gobyerno ang posible pagbalik sang Pilipinas bilang myembro sang ICC.
Pahayag naman ni Sara Duterte, ginatahod niya ang pahayag ni Marcos bangud ang presidente amo ang architect sang foreign policy sa pungsod.
“We all should respect the position of the President, being the chief architect of foreign policy. His position should be the position of all.”
Dugang sini, “But we will continue to reach out to DOJ regarding our position on this matter… and we will lay down the legal basis of our position.”
(Karl Norman Alonzo/Presidential Communications Operations Office)
Matandaan nga nagkalas si anay Presidente Duterte sa international tribunal sang 2018 kag nangin epektibo ang nasambit nga withdrawal sang 2019.
Kun basehan ang rekord sang gobyerno, ginapahayag nga 6,200 ka drug suspects ang napatay sa operasyon sang mga pulis sa “war on drugs” halin sang Hunyo 2016 tubtub sang Nobyembre 2021.
Kun lantawon naman ang mga pahayag sang human rights groups, nagatupa sa 12,000 tubtub 30,000 ka mga tawo ang napatay sa amo nga tion.#
