ILOILO CITY- Nagpasalig ang Iloilo Police Provincial Office nga indi na masulit ang natabo sa Tigbauan Municipal Police Station nga may nakapalagyo nga preso.
Ang preso amo si Jesry Manlapuz, alyas Kalbo, 21, residente sang Barangay 3, Poblacion, Tigbauan, Iloilo kag nadakpan sang nagligad lamang nga Nobyembre 17 sa isa ka drug buy bust apang nakapalagyo kag sang ulihi, nagdesisyon man nga magsungka.
Sa interview sang Bombo Radyo kay PMaj Rolando Araño, spokeperson sang Iloilo Police Provincial Office, iya ginpahayag nga ang natabo ang nagaserbe nga warning sa tanan nga police stations nga indi gid magkumpiyansa kag mangin alerto.
Ginakabig naman sang Iloilo Police Provincial Office nga isolated case lamang ang kaangay nga insidente.
Matandan nga nakapalagyo si Manlapuz matapos naghingyo ini sa pulis nga makadto siya sa comfort room agud makapangihi kag sang naka-tiempo, didto na ini nalagyo.
