May isa pa ka bulan antes matapos ang 2023 apang gin-anunsyo na sang United Nations (U.N.) nga ini nga tuig ang pinakamainit sa bilog nga maragtas sang kalibutan.
Ginpahayag ini ni U.N. Secretary-General António Guterres sa atubang sang mga world leaders nga nagtipon sa global climate summit sa Dubai, United Arab Emirates.
Suno kay Guterres, sandig ini sa kumpirmasyon sang UN World Meteorological Organization kun sa diin nakit-an nga nagasaka ang global temperatures sang 1.4 degrees Celsius lapaw sa pre-industrial levels. Sa report pa sang amo nga organisasyon, ang period halin sang 2015 tubtub sa 2023 amo ang may pinakamataas nga temperatura sa human history.
© Michael Probst/AP via RFI
“We are living through climate collapse in real time – and the impact is devastating,” kabahin sang video statement ni Guterres. “Record global heat should send shivers down the spines of world leaders. And it should trigger them to act.”
TEMPRANO NGA KADALAG-AN
Makabig man nga madinalag-on ang una nga adlaw sang duha ka semana nga climate summit bangud sang pagpasalig sang mga nasyon nga maghatag sang pondo para sa pigado nga mga pungsod agud magamit sa tunga sang nagakatabo nga climate disasters.
Madamo ang nagdayaw sa sini nga damage fund bangud dinekada man ang gindugay antes ini mapatigayon.
Kabahin sang naghatag sang kontribusyon amo ang United Arab Emirates nga may $100 million ukon P5.5-billion; $51 million ukon P2.8-billion halin sa Britain; $17.5 million ukon P971.7-million halin sa United States; kag $10 million ukon P555.3-million halin sa Japan.
Sang ulihi, nagpasalig man ang European Union sang $245.39 million ukon P13.6-billion lakip na ang $100 million ukon P5.5-billion halin sa Germany.
“This sends a positive signal of momentum to the world and to our work here in Dubai,” suno kay Cop28 president Sultan Al Jaber nga nagtawag pa sang desisyon sang world leaders bilang “historic”.
