ILOILO CITY – Nag-upod ang Israel sa international community sa pagkondenar sa nagluntad nga pagpamomba sa Mindanao State University sa Marawi City nga ginkapatay sang apat ka mga tawo kag ginkalipas sang madamo nga iban pa.
Domingo sang aga sang nagasimba ang pila ka mga manunudlo kag estudyante sa gymnasium sang eskwelahan sang natabo ang pagpamomba.
Sa statement sang Embassy of Israel, naga-isa ang bilog nga pungsod sa Philippine government kag Filipino people sa pag-atubang sang sini nga makahalanusbo nga terrorist attack.
Pahayag pa sang embahada, ang terorismo ang isa ka pangkalibutanon nga pamahog nga nagakinahanglan sang pag-isa sang mga pungsod agud nga mabantayan ang kinamatarong sang tanan nga tawo.
Ang Estados Unidos, Japan, Canada, Australia, France kag ang European Union ang una na nga nagkondenar sang pagpamomba nga nagresulta sang heightened security alert, lakip na sa capital nga Manila.
Subong man nga adlaw, ginpahayag sang Philippine military nga gina-validate nila ang claim sang Islamic State nga sila ang responsable sa pagpamomba sa Dimaporo Gymnasium.
Magluwas sa Islamic State, ginpahayag ni Armed Forces of the Philippines public affairs office chief Colonel Xerxes Trinidad nga gina-tsekyar man nila ang posibilidad nga may kaangtanan ang natabo sa Dawlah Islamiyah – Maute Group.
Sa subong, gina-imbestigaran na sang militar kag sang pulis ang bomb signature nga gingamit agud nga matumod kun ano nga grupo ang responsable sa pagpang-atake.
