Nagpanawagan ang presidente sang Palestine nga tapuson na ang gyera sang Israel sa Gaza.
Lakip man sa ginhingyo ni Palestinian President Mahmoud Abbas amo ang international peace conference agud nga makabalay sang political solution nga protektahan sang world powers agud nga makaestablisar sang sovereign Palestinian state sa Gaza Strip, West Bank kag East Jerusalem.
Suno sa 87-anyos nga presidente, nakadangat na ang away sang Israel kag Palestinians sa isa ka maka-alarma nga estado kag magluwas diri, ginpabaskog pa sang Israel ang pag-atake mangin sa West Bank.
Ginpanindugan sini ang iya pagpati nga mas kinahanglan ang negosasyon sa baylo sang paggamit sang pwersa sang militar.
Nahibaluan nga takos na duha ka bulan halin sang natabo ang pag-atake sa Gaza kun sa diin masobra na sa 17,000 ka mga tawo ang napatay kag 46,000 ang nasamaran, kag 1.9 million ka tawo ang nagtal-as sa ila kaugalingon nga mga balay.
