ILOILO CITY- Patigayunon na sa Sabado, Disyembre 16, ang Pamukaw may kaangtanan sa selebrasyon sang Dinagyang Festival 2024.
Sa interview sang Bombo Radyo kay Ms. Joyce Ann Clavesillas, Executive Director sang Iloilo Festivals Foundation Incorporated, iya ginpahayag nga ini ang pagasuguran paagi sa misa sa San Jose Parish Placer kag pagasundan sang foot parade nga magaagi sa JM Basa Street kag Iznart padulong sa Iloilo Provincial Capitol.
Suno kay Clavesillas, magapasakop sa Pamukaw ang mga tribu sa Dinagyang tribes competition.
Pahayag niya, gindungan ang Pamukaw sa una nga adlaw sang Misa de Gallo bilang pagdayaw kay Sto. Niño nga amo man si Hesukristo, ang sentro sang Paskwa.
Ang tema sang Dinagyang Festival 2024 amo ang “Pagdayaw kay Señor Sto. Niño, Padayaw sang mga Ilonggo!”
