ILOILO CITY – Natalana nga pirmahan ni President Ferdinand “Bongbong” Marcos Jr. ang ginaduso nga P5.768 trillion 2024 national budget sa Disyembre 20.
Ini ang ginkumpirma ni Senate President Juan Miguel Zubiri.
Suno kay Zubiri, kun indi siya magsala, ang pagpirma sang budget ang matabo sa aga matapos ang isa ka adlaw nga pagpahuway sang presidente nagikan sa Japan.
Magapauli ang presidente sa Disyembre 18.
Nagalaum man ini nga indi pag-i-veto ni Marcos ang pila ka mga items sa budget lakip na ang pagpasaka sang unprogrammed funds, nga ginbalabagan ni Senate Minority Leader Aquilino “Koko” Pimentel.
Ang ginaduso nga budget para sa masunod nga tuig ang nagdangat sa P5.768 trillion, kag suno kay Zubiri, napasa na nila ini sa Office of the President.
Pahayag niya, sigurado nga maga-overtime ang legal department sang Malacañang agud ma-tsekyar kun may i-veto sila.
Apang suno sa iya, base sa feedback sang Department of Budget and Management, wala naman sang problema.
Ginpahayag man ni Zubiri nga sang ginpatigayon ang bicameral conference sang senado kag House of Representatives, yara ang presensya sang Budget Management agud nga mag-raise sang pila ka mga concerns sa budget proposal.
