ILOILO CITY – Gin-anunsiyo sang Philippine Coast Guard nga nagapakig-angut na sila sa China shipping company appointed surveyor may kaangtanan sa imbestigasyon sa gina-alegar pagbunggu-anay sang Philippine fishing banca kag Chinese-flagged vessel nga MV TAI HANG 8.
Sa isa ka statement, nagpakig-angut ang Philippine Coast Guard sa maritime services company nga Pandiman Philippines nga gin-appoint sang Tai Hang Shipping Company Limited agud nga magpatigayon sang transparent kag maid-id nga imbestigasyon agud nga matumod ang rason, ang sahi kag extent sang gina-alegar nga collision.
Ang Tai Hang Shipping Company Limited kag ang Ambassador of China ang una na nga nagpahayag nga nabaton na nila ang opisyal nga sulat sang Philippine Coast Guard may kaangtanan sa insidente.
Sang Disyembre 5, ang Chinese vessel nga MV TAI HANG 8 ang gina-alegar nga nagbunggo sa Filipino fishing banca malapit sa Paluan, Occidental Mindoro, kag nagpadayon lamang sa paglayag nga nagbilin sang lima ka mga indibidwal nga nagpa-utaw-utaw sa sulod sang apat ka oras antes nakabaton sang rescue.
Ang mga biktima ang gindeklara nga yara sa maayo nga kondisyon kag gin-turn over sa ila mga pamilya.
Nagpaandam man sadto si Philippine Coast Guard Commandant Admiral Ronnie Gil Gavan nga lagson sang ila ahensya ang sin-o man nga magkomiter sang offenses sa sulod sang kadagatan sang Pilipinas.
