ILOILO CITY– Naglab-ot sa kapin P3.5 million ang balor sang iligal nga druga nga nakuha sa mag-live in partner sa ginpatigayon nga drug buy bust operation sa Barangay Tanza Bonifacio, Iloilo City Proper.
Ang subjects amo sanday Jhona Rose Espinas nga pumuluyo sang amo nga barangay kag Khim Roger Pahunao nga residente sang Barangay San Juan, Molo, Iloilo City kag lunsay ginakabig nga High Value Individual.
Nakuhaan ang duha sang 10 ka magagmay nga sachets kag tatlo ka dalagko nga sachets sang suspected shabu.
Sa interview sang Bombo Radyo kay PLt.Col. Antonio Benitez Jr., chief sang City Drug Enforcement Unit sang Iloilo City Police Office, iya ginpahayag nga base sa record, halos bilog nga pamilya ni Pahunao ang involved sa illegal drugs bangud nadakpan na man sadto ang iya utod kag ginikanan kag ang iya tiyo ang napreso man sa Muntinlupa bangud sa amo man nga kaso.
Suno kay Benitez, ang duha ang pareho nga nagaupod sa transaksyon sang iligal nga druga.
Ginapahayag nga nagahalin sa New Bilibid Prison ang druga nga ila ginabaligya.
