ILOILO CITY- Nagpaandam ang Philippine Atmospheric, Geophysical and Astronomical Services Administration nahanungod sa pagluntad sang drought ukon tuman nga pagmala sang mga duta sa Western Visayas sa masunod nga tuig.
Sa interview sang Bombo Radyo kay Jan Baron, weather observer sang Philippine Atmospheric, Geophysical and Astronomical Services Administration ukon PAGASA Iloio Weather Surveillance Doppler Radar, iya ginpaathag nga ang drought amo ang lima ka sunod-sunod nga bulan nga below normal ang rainfall condition.
Suno kay Baron, sa ila forecast, sa katapusan sang Abril ukon Mayo maeksperyensyahan ang drought condition sa bilog nga kaprobinsyahanan sang Western Visayas.
Apang gin- athag ni Baron nga apisar may drought, maeksperyensyahan sa gihapon ang pag ulan apang tuman ka gamay lang nga below 1 milimeter kag madamo ang inadlaw nga wala sang ulan.
