ILOILO CITY- Naglab-ot na sa 2,000 tonelada sang basura ang natipon sang City Environment and Natural Resources Office sa syudad sang Iloilo sa sulod lang sang isa ka semana.
Sa interview sang Bombo Radyo kay Engr. Neil Ravena, head sang City Environment and Natural Resources Office, iya ginpahayag nga subong lang nga Disyembre, nadugangan sang kapin 40 tubtob 50 tonelada kada adlaw ang ila mahakot nga basura ukon katumbas sang 425 tonelada kada adlaw.
Suno kay Ravena, isa ang downtown area sa may pinakadako nga volume sang basura subong nga bulan.
Pahayag niya, ini bangud sa open sidewalk vending sa bilog nga bulan sang Disyembre kun sa diin nahatagan sang kahigayunan ang madamo nga vendors nga magbaligya sa sidewalk sang nagkalain- lain nga mga produkto gani nagadamo man ang mga basura.
