ILOILO CITY- Patay ang isa ka driver sang depampasahero nga jeep matapos mabungguan sang van sa Bangga Modesto, Brgy. Jalaud Norte, Zarraga, Iloilo.
Ang biktima amo si Rex Ladera, 44-anyos, residente sang Barangay Inagdangan Centro, Zarraga.
Ang driver naman sang Nissan Urvan nga nakabunggo amo si Kyle Fernandez, 20-anyos, residente sang Brgy. Jibao-an, Pavia, Iloilo.
Sa interview sang Bombo Radyo kay Police Master Sergeant Ryan Gayuma, imbestigador sang Zarraga Municipal Police Station, iya ginpahayag nga halin sa Dumangas kag padulong sa Pavia ang van apang sang pag-abot sa lugar, hinali lang nagtabok sa dalan ang biktima kag nabungguan gid sang van.
Suno kay Gayuma, nakaangkon sang mga pilas sa lawas si Ladera nga gintunaan sang iya kamatayon.
Ginpahayag sang imbestigador nga posible nga wala makita sang driver ang lalaki nga nagatabok sa dalan bangud nga madamol ang ulan sang amo nga tion.
Sa subong, nakahunong na sa Zarraga Municipal Police Station si Fernandez samtang nagahulat sang desisyon sang pamilya ni Ladera kun magapasaka sila sang kaso.
