ILOILO CITY- Isa ka tawo ang patay kag pito ang pilason sa nagluntad nga aksidente sa Brgy. Centro Norte, Pandan, Antique.
Sa interview sang Bombo Radyo kay Broderick Train, Head sang PDRRMO-Antique, iya ginpahayag nga sa pito ka pilason, duha ang kritikal kag isa ang gindeklara nga Dead on Arrival (DOA).
Suno kay Train, madasig ang pagpadalagan sang driver sa pick-up nga halin sa direksyon sang Nabas, Aklan sang ini ang naglapaw sa karsada kag nagdiretso sa talamnan nga nagresulta sa pagkabunggo sa mga tawo nga nagabakal sang palupok.
Wala pa makahatag sang pangalan sang mga biktima ang kapulisan samtang padayon ang imbestigasyon.
Yara na sa kustodiya sang Pandan Municipal Police Station ang driver sang pick-up.
