ILOILO CITY- Nagpaathag ang National Grid Corporation of the Philippines kasunod sang nagluntad nga total blackout sa bilog nga Western Visayas.
Sa interview sang Bombo Radyo Iloilo kay Reagan Alcantara, lead specialist sang Public Relations Department sang National Grid Corporation of the Philippines, iya ginpahayag nga my naeksperyensiyahan nga heavy system voltage disturbance sa Panay grid nga rason sang pag-trip off sang tanan nga generating units sa isla.
Suno kay Alcantara, ginpataas man ang yellow alert sa bilog nga Panay matapos nga wala naka-generate sang kuryente ang tanan nga power plants.
Ang yellow alert ang gina-isyu kun ang operating margin ang indi bastante para malab-ot ang regulatory kag contingency requirements sang transmission grid.
Apang gin-lift man ang amo nga yellow alert.
Suno pa kay Alcantara, 302 megawatts (MW) ang nadula sa Visayas grid bangud sa tripping sang mga planta, samtang 150 MW naman ang nadula bangud sa planned maintenance shutdowns ukon kabilugan nga 452 MW nga nangin unavailable sa bilog nga Visayas grid.
Sa bahin naman sang Panay Energy Development Corporation, nagpaathag ini nga may yara sang natabo nga fluctuation sa ila system.
Sa interview sang Bombo Radyo kay Engr. Erick Sarino, Assistant Vice President kag Deputy Site Head sang Panay Energy Development Corporation, iya ginpahayag nga nakaapekto sa ila equipment ang amo nga fluctuation kun sa diin nagkaproblema sa ila boiler units.
Nagpangabay man ini sa mga distribution utilities nga indi anay magload para maka-energize, sa baylo, hulaton na lang nga mag-stabilize ang power supply.
Sa interview naman sang Bombo Radyo kay Miss Joy Facinal Fantilaga, spokesperson sang MORE Electric and Power Corporation, iya ginpahayag nga nagahulat lamang sila sang abiso gikan sa National Grid Corporation of the Philippines kun kinahanglan nila nga magpatuman sang rotational brownout ilabi na sa mga lugar nga wala pa sang supply sang elektrisidad.
As of ala-una kaina sang kaagahon, ginhatagan na sila sang National Grid Corporation of the Philippines sang clearance nga mag- energize sang 3 Megawatts kun sa diin ginaprayoridad ang mga feeders nga may mga vital institutions kaangay sang hospitals.
Padayon naman ang pagpangayo sang MORE Power sa National Grid Corporation of the Philippines sang dugang nga load agud ma-energize kuntani ang mga nabilin nga offline nga feeders, apang wala pa may inug hatag ang korporasyon bangud unstable pagid ang power supply.
As of 4am naman, nagapabilin nga pulo (10) sa gihapon sa bente kwatro (24) nga feeders sang MORE Power ang online.
