ILOILO CITY- Gin-athag sang Traffic Management Unit sang syudad nga indi pa gihapon maistriktuhan ang pagsunod sa mga loading and unloading zones apisar nga epektibo na ang Enhanced Local Public Transport Route Plan sang Iloilo City Government.
Sa interview sang Bombo Radyo kay retired Police Colonel Uldarico Garbanzos,pinuno sang amo nga unit, iya ginpahayag nga walapa nakompleto ini nga mga zones apang ginapadasig na subong ang pagbutang sang signages kag pavement markings sa 850 ka loading and unloading areas.
Suno kay Garbanzos, samtang wala pa nakompleto ini nga mga zones, padayon naman ang ila pag-orient sa mga drivers kag konduktor agud nga sa tion nga mapatuman na ini, mangin matalunsay na lamang bangud may ideya na ang mga ini.
May kaangtanan naman sa concern sang publiko nga wala sang waiting shed nga mahimo pasilungan sang mga pasahero kun mag-ulan, nagalaum si Garbanzos nga mahatagan man ini igtalupangod sang syudad kag mapainan sang budget.
Nahibaluan nga kadungan sang pagpatuman sang bag-o nga route plan, ang mga traditional jeepneys lang nga nakapa-consolidate sa mga kooperatiba kag korporasyon kag may yara sang sticker ang ginapasugtan nga makabiyahe sa siyudad kag kabigon ngaa colorum ang wala sang sticker apang padayon nga nagabyahe.
