Nagkalain-lain ang mga reaksyon sang mga pungsod kasunod sang paglunsar sang Estados Unidos sang Amerika kag United Kingdom sang airstrikes sa Yemen batok sa Houthi rebels nga suportado sang Iran kag amo ang nagapang-atake sang mga nagalabay nga barko sa Red Sea.
Suno sa Iran, ang strikes sang US kag UK ang maathag nga paglapas sa soberanya kag territorial integrity sang Yemen.
“The attacks are happening in an effort to extend the full support of the US and UK in approximately the past 100 days for the war crimes of the Zionist regime against the Palestinian people and the besieged citizens of Gaza,” suno sa Ministry of Foreign Affairs.
Sa Turkey naman, ginkondenar ni President Recep Tayyip Erdogan ang strikes kag ginsiling sini nga daw kaangay nga ginatinguhaan sang US kag UK nga himuon ang Red Sea nga dagat sang dugo bangud sa ila nga ginhimo.
“All of these acts are disproportionate use of force,” pahayag sang presidente. “Israel also resorts to this disproportionate use of force in Palestine.”
Sa Jordan, ginbasol naman ni Jordanian foreign minister Ayman Safadi ang pagpang-atake sang Israel sa Gaza nga amo ang rason kun ngaa nagsaka ang tensyon sa rehiyon.
Nagdepensa naman ang NATO kag gindampigan ang US kag UK paagi sa pagsiling nga ini nga strikes ang depensa lamang kag ginhimo agud mapabilin ang freedom of navigation sa Red Sea.
Ginalantaw man sang military alliance nga paagi ini agud tapuson ang mga pagpang-atake sang Houthis.
Ginmensyonar man sini ang Iran nga amo ang nagasuporta sa rebelde: “Houthi forces are supported, supplied and equipped by Iran, so Tehran has a special responsibility to rein in its proxies.”
Nahibaluan nga indi involved ang NATO sa amo nga airstrikes apang myembro sang amo nga alyansa ang US kag UK samtang naghatag naman sang surporta ang duha ka iban pa nga myembro sang alyansa nga the Netherlands kag Canada.
Sa pihak nga bahin, ang Hezbollah nga isa ka grupo sa Lebanon kag kaalyado sang Iran kag Houthi, ang nagsiling nga ang pagpang-atake sang US ang nagakumpirma lamang sang ila nga “full partnership” sa Israel.
“The US is a full partner in the tragedies and massacres committed by the Zionist enemy in Gaza and the region,” suno sa gin-release nga statement sang grupo.
Una na nga ginpahayag ni U.S. President Joe Biden nga ang “targeted” strikes nga ila ginhimo sa Yemen ang nagapakita nga wala nila ginatolerar ang mga pagpang-atake sang Houthis sa mga barko sa Red Sea. Matandaan nga lakip sa gin-atake amo ang Galaxy Leader nga may sakay nga 17 ka mga Pinoy — isa ang Ilonggo.
“These targeted strikes are a clear message that the United States and our partners will not tolerate attacks on our personnel or allow hostile actors to imperil freedom of navigation,” suno kay Biden.#
(Photo: CNN)
