ILOILO CITY- Isa na naman ka cargo ship ang gin-igo sang missile sa Red Sea.
Naghalin ang barko sa Vietnam sakay ang 24 crew members, base sa isa ka source sa Greek Ministry of Maritime Affairs and Insular Policy.
Suno kay Yahya Sarea, military spokesperson sang Houthi, gin-target sang Yemeni rebels ang Zografia ship,isa ka Malta-flagged kag Greek- owned nga cargo ship nga padulong sa Israel.
Base sa impormasyon, nag-agom sang limited damage ang barko, apang nagpadayon ini sa pagbyahe.
Wala naman sang narecord nga injuries sa mga tawo nga sakay sini.
Nahibaluan nga nagsugod ang pagpang-atake sang Iran- backed nga Houthis sa mga Israel-linked commercial vessels humalin sang Nobyembre bilang sabat sa pagpang-atake man sang Israel sa Gaza.
Nagpamahog man ang grupo nga pasangkaron ang ila targets sang pagpang-atake sa Red Sea nga magalakip sang barko sang United States bilang sabat sa American kag British strikes sa ila nga mga ginahukmungan sa Yemen.
