Ginpanginwala sang Iran nga sila ang may kahimuan sa makamamatay nga pagpang-atake sa military base sang Estados Unidos sang Amerika sa Jordan nga rason sang kamatayon sang tatlo ka mga soldado kag nasamadan man ang 34 ka iban pa.
Una na nga ginpahayag sang US nga indi pa kumpleto ang ila nga impormasyon kaangot sa aerial drone attack apang nakahibalo sila nga ini kahimuan sang mga milintante nga grupo sa Iraq kag Syria nga suportado sang Iran.
Suno naman sa Iranian Foreign Ministry, sulit-sulit lamang ang ginahimo sang Amerika nga paghaboy sang wala basehan nga mga akusasyon.
“Regional resistance factions do not receive orders from Iran, and Iran does not interfere in the decisions of the resistance to support Palestine or defend itself,” pahayag ni Iranian Foreign Ministry spokesperson Nasser Kanaani.
Sa pagkamatuod suno sa Iran, ang gyera indi amo ang solution kundi ang gilayon nga pagpatuman sang ceasefire sa Israel kag Hamas nga amo ang maga-resulta sa pagbalik sang kalinong sa Middle East.
Apisar sini, nanindugan si US President Joe Biden nga magatimalos ang Amerika kag ginpasalig naman ni Defense Secretary Lloyd Austin nga himuon nila ang tanan agud nga protektahan ang pungsod, ang ila militar, kag ang ila interes.
Sa subong, sandig sa impormasyon, nagtalal-as na ang mga hangaway nga suportado sang Iran sa east Syria bangud sa kahadlok nga may airstrike nga ilunsar ang US batok sa ila.
Ginkumpirma man sang US Defense Department nga ang tatlo ka napatay nga American service members amo ang Army reservists nga sanday Sgt. William Jerome Rivers, 46, sang Carrollton, Georgia; Spc. Kennedy Ladon Sanders, 24, sang Waycross, Georgia; kag Spc. Breonna Alexsondria Moffett, 23, sang Savannah, Georgia.
Ang nasambit nga drone attack amo ang ginakabig pinakamakamamatay nga pagpang-atake batok sa US service members halin sang napatay ang 13 ka Americans sa suicide bombing sa Kabul sang naga-pull out ang US military sa Afghanistan sang 2021. #
