Gin-anunsyo sang Russia nga 28 ka mga tawo ang napatay lakip na ang siyam ka mga babayi kag isa ka bata sang gin-atake sang armadong kusog sang Ukraine ang isa ka bakery kag restaurant sa syudad sang Lysychansk.
Nahamtang ini nga syudad sa nasidlangan nga bahin sang Ukraine kag kontrolado na sang Russia.
Suno sa mga opisyal sang Russia, naggamit ang Ukraine sang High Mobility Artillery Rocket System nga ginsuplay sang Estados Unidos sang Amerika.
Ginpahayag nga puno sang mga sibilyan ang bakery sang nag-atake ang Ukraine.
Dugang pa sang Russian emergency ministry, 10 pa ka mga tawo ang nabutong nga buhi halin sa mga debris samtang apat naman ang natumod nga yara sa kritikal nga kondisyon.
Nahibaluan nga kontrolado na sang Russia ang nasidlangan nga bahin sang Ukraine halin sang ginmandu ni President Vladimir Putin ang invasion sang Pebrero 2022 nga amo ang ginakabig pinakadaku nga gyera sa Europa halin sang World War Two.
