ILOILO CITY- Hugot nga ginpanginwala sang mga tiglawas sang Department of Health (DOH) kag Department of Labor and Employment (DOLE) ang involvement sang duha ka mga ahensya sa kontrobersyal nga signature campaign agud amyendaran ang 1987 Constitution.
Ini kasunod sang pagmitlang ni Senator Imee Marcos sa Senate hearing, nga ang Medical Assistance for Indigent Patients (MAIP) sang Department of Health kag ang Tulong Panghanapbuhay sa Ating Disadvantaged/Displaced Workers (TUPAD) program sang Labor Deparment ang gin-gamit agud magtipon sang mga pirma para sa ginaduso nga amyendaran ang 1987 Constitution.
Suno kay Richard Jimenez, Chief Health Program Officer sang Malasakit Program Office sang Department of Health, hugot nila nga ginapanginwala kag ginakondenar ang akto sang paggamit sa Medical Assistance for Indigent Patients kabaylo sang pirma para sa charter change.
Sa bahin naman ni Labor Undersecretary Benjo Santos Benavidez, ginpanginwala man sini ang ginaalegar nga involvement sang programa sang ahensya sa amo nga signatiure campaign.
Suno kay Benavidez, ang TUPAD program ang may katuyuan nga maghatag sang temporaryo nga trabaho sa nagakinahanglan nga mga Filipinos.
Antes ang clarification nanday Jimenez kag Benavidez, una naman nga nagdepensa si Social Welfare and Development Undersecretary Fatima Aliah Dimaporo matapos nga gin-angot man ang Abot Kamay ang Pagtulong (AKAP) program sa amo nga signature campaign.
Suno kay Dimaporo,wala ginhimo ang nasambit nga programa agud i- bribe ang publiko nga suportahan ang Cha-cha.
Una diri, may mga testigo halin sa Davao City nga nagpamat-ud nga ang cash kag government benefits ang ginagamit agud engganyuhon ang mga tawo nga magpartisipar sa signature campaign para sa amendment sang Constitution.
