Mabudlay mag-trabaho kun nagapalanakit ang imo likod, batiis, ukon balikawang. Apang paano naman kun ang may masakit sa imo amo ang imo heart?
Pwede man ina ayhan maka-absent?
Pwede na maka-leave gamit ina nga rason… kun maaprubahan ang hagna nga ginduso sang isa ka mamalidha kun sa diin ginahingyo nga hatagan sang heartbreak leave kag emotional support resources ang mga empleyado nga brokenhearted kag wala pa naka-move on.
Ini ang kaundan sang ginaduso nga Heartbreak Recovery and Resilience Act ukon House Bill 9931 nga gin-file ni Cagayan de Oro City Rep. Lordan Suan.
Suno kay Suan, ini nga hagna ang maga-address sa importante (apang masami indi masapakan) nga factor kun sa diin may daku gid nga impact sa performance sang empleyado amo man sa iya nga pagpakig-angot sa iban nga mga tawo.
Gintawag ini sa hagna nga “emotional turmoil” nga naangot sa natabo nga “breakup”.
Sa idalom sang sini nga bill, ang kuwalipikado nga mga empleyado nga wala pa naka-25 anyos ang mahimo mahatagan sang isa ka adlaw nga heartbreak leave kada tuig apang wala lang sang bayad.
Sa mga empleyado naman edad 25-35 anyos, mahimo ma-avail ang maximum nga duha ka adlaw nga wala sang bayad nga heartbreak leave kada tuig.
Sa mga nagaedad naman 36-anyos pasaka, mahimo ma-avail ang tatlo ka adlaw nga unpaid heartbreak leave.
Ngaa isa lang ka adlaw ang para sa mga bataon pa nga empleyado?
Rason ni Suan, ang mga mas tigulang ang nagapangatubang sang complex nga family dynamics ukon financial dependencies kun sa diin mas malawig-lawig nga tion ang kinahanglan.
Agud mangin kuwalipikado para sa heartbreak leave, dapat nga maghatag ang employee sa iya employer sang pirmado nga statement kun sa diin nakasaad nga may problema sa romantic relationship sa nagligad nga isa ka bulan.
Dapat man nga may ihatag ang empleyado nga written notice sang intensyon nga i-avail ang heartbreak leave at least 48 ka oras antes ang adlaw sang pag-avail magluwas lamang kun may yara sang mga sirkumstansya nga matabo.
Mangin mandato naman sang Department of Labor and Employment kag Civil Service Commission kaupod sa mental health professionals nga mag-develop kag magpalapta sang evidence-based resource materials sa pag-navigate sang heartbreak kag emotional well-being sa government offices, employers, kag employees.
Pagamanduan man ang amo nga mga ahensya nga magtukod sang programa agud nga mag-suporta sa development kag implementasyon sang confidential emotional support programs sa sulod sang mga ulubrahan.#
