Nagpaandam ang mga ahensya sang gobyerno nga ang 2024 ang posible isa sa pinakamainit nga tuig bangud sa El Niño phenomenon.
Suno sa Philippine Atmospheric, Geophysical and Astronomical Services Administration (PAGASA), ang bug-os gid nga impact sang El Niño ang posible nga mabatyagan sa pag-abot sang Marso tubtub Mayo kun sa diin posible nga yara sa 34.6°C tubtub sa 36.5° ang temperatura sa Metro Manila.
Posible man maglab-ot ang heat index sa 40°C nga mas mataas kag mas mapaang ipaanggid sa na-rekord sang nagligad nga summer.
Suno naman sa Office of Civil Defense (OCD), ang nagasaka nga temperatura ang may daku nga risgo sa ikaayong lawas, agrikultura, kag mangin sa mga hinuptanan nga sapat.
Panugyan sang opisina, dapat nga walo tubtub dose gid ka baso sang tubig ang imnon kada adlaw agud nga mamentenar ang hydration.
Nagpaguwa man sang pahanumdom ang Department of Agriculture (DA) sa farmers nga may mga sagod nga baboy, baka, kanding, kag iban pa nga kabahin sang livestock nga protektahan ang mga sapat gikan sa heatstroke.
Importante suno sa talatapan ang monitoring kag dapat nga bastante man ang tubig nga ilimnon kag indi na pagpa-initan pagpatak sang 10:00 sa aga tubtub 3:00 sa hapon.
Ang El Niño phenomenon amo ang abnormal nga pag-init sang surface temperature sa dagat sa central kag eastern equatorial Pacific Ocean kag may yara man sang below-normal nga pagtupa sang ulan.
Sang Mayo 2023, matandaan nga nag-isyu man ang PAGASA sang El Niño Alert matapos nakit-an sa forecast nga matabo ini nga phenomenon sa masunod nga tatlo ka bulan kag posible maglawig tubtub sa una nga quarter sang 2024. #
(Photo: Joven Cagande)
