Nagapakig-angot na ang Department of Agriculture (DA) sa Department of Social Welfare and Development (DSWD) kaangot sa plano sini nga bugas ang ipanagtag sa baylo nga kuwarta para sa pigado nga mga Pinoy partikular sa mga benepisyaryo sang Pantawid Pamilyang Pilipino Program ukon 4Ps.
Ang 4Ps amo ang conditional cash transfer program sang gobyerno kun sa diin ang kuwalipikado nga pigado nga mga pamilya ang nagabaton sang cash grant sa kondisyon nga sundon lamang ang requirements kaangay sang attendance sang bata sa eskwelahan kag iban pa.
Suno kay Agriculture Undersecretary Roger Navarro, kun mapatuman na ini nga plano, mapanubo sang gobyerno sang 20% ang demand sa bugas.
Apang suno sa opisyal, may mga ginahikot pa subong ang ahensya sa mga pagpangkahat sa rice supply stabilization.
Matandaan nga ginmuno sang ahensya ang ideya sa pagpanagtag sang bugas kasunod sang meeting sa tunga sang agriculture officials akg sang presidente sa Malacañang sang nagligad nga Martes.
“We’re giving them money, and unfortunately, because that is not rice, they’re going to buy rice at the market price, and that put pressure and inflationary in the market because they’re going to compete with the people who have money,” una na nga ginpahayag ni Navarro.
Ginpahayag nga ginakonsiderar man ni President Bongbong Marcos ang amo nga proposal kag ginatun-an na subong.
Ginpahayag man sang DA nga sang 2023, naka-harvest ang pungsod sang 20.06 million metric tons sang bugas, naka-import sang 3.5 million metric tons nga mas manubo ipaanggid sa 3.8 million metric tons nga import volume sang 2022.#
