Nagpagwa ang Commission on Elections (Comelec) sang withdrawal forms para sa mga tawo nga luyag nga magbawi sang ila nga pirma nga nahatag anay sa kontrobersyal nga People’s Initiative (PI) campaign agud iduso ang charter change ukon amyendahan ang 1987 Constitution.
Suno sa Comelec, base sa pronouncement ni Sen. Bato Dela Rosa sa Senate hearing sang nagligad nga Martes, may mga indibidwal nga nagpabutyag sang ila nga intensyon nga bawion ang ila nga pirma rason nga nag-release ang poll body sang Withdrawal Form of Signature sa Signature Sheets ukon Petition for People’s Initiative.
Suno pa sa talatapan, available ini nga pormas sa opisina sang Election Officers sa bug-os nga pungsod.
Kun makumpleto na ang dapat ibutang sa withdrawal form, igapasa man ini sa opisina gihapon sang election officer.
Apang suno sa Comelec, ini nga withdrawal form ang para gid lamang sa “recording purposes” kag indi makabig nga pormal nga tikang sa people’s initiative.
Epektibo man gihapon subong ang ginpagwa sang Comelec nga suspensyon para sa people’s initiative nga nagsugod sang nagligad nga Enero 29,2024.
Matandaan nga bisan may gindagdag nga suspension, nagpahayag ang people’s initiative lead convenor nga si Noel Oñate nga magapadayon ang signature campaign bangud ang ginsuspinde lamang sang Comelec amo ang pagbaton sang natipon na nga mga pirma. #
