Gin-report sang Committee to Protect Journalists nga 99 ka mga journalists ang ginpangpatay sang 2023 kag sa sini nga numero, 72 gid ang nabiktima bangud sa gyera sa tunga sang Israel kag Hamas militants.
Ini nga death toll amo ang pinakamataas halin sang 2015 kag may saka nga 44 porsyento halin sa numero nga napagkit sang 2022.
Suno sa report sang committee sang Disyembre 2023, mas madamo pa nga numero sang journalists ang napatay sa nauna nga tatlo ka bulan sang gyera sa Gaza ipaanggid sa mga napatay sa isa ka pungsod sa bilog nga tuig.
Sa 72 nga napatay sa Israel-Hamas conflict, nalakip diri ang tatlo ka Lebanese kag duha ka mga Israeli.
Ginpahayag man sa report nga ang kamatayon sang Palestinian journalists sa sini nga gyera ang magabilin sang long-term nga impact sa journalism indi lamang sa teritoryo sang Palestine kundi sa bilog nga rehiyon kag mangin sa iban nga mga pungsod.
Na-mensyonar man sa report sang committee ang pangalan sang radio broadcasters sa Pilipinas nga ginpatay sang 2023.
Ini amo sanday Juan Jumalon, 57, nga gintiro samtang naga-live broadcast sa iya kaugalingon nga balay sa Calamba, Misamis Occidental sang Nobyembre; kag si Cresenciano Bundoquin, 50, nga gintiro sang Mayo sa Calapan City, Oriental Mindoro.
Suno sa report, vulnerable ang mga radio journalists sa Pilipinas bangud makabig ang radyo nga isa ka influential platform.#
(Abed Zagout/Anadolu via Getty Images via Al Jazeera)
