Ginpa-untat na ang rescue dog sang Philippine Coast Guard (PCG) nga si Appa sa pagbulig sa search kag rescue mission sa Barangay Masara sa Maco, Davao de Oro kun sa diin natabo ang landslide kag 98 na ang naisip nga patay.
Suno kay Maco Mayor Arthur Carlos Voltaire Rimando, tuman na ka kapoy ang amo nga ido bangud antes ini nag-intra sa team sa Davao de Oro, nagbulig man ini sa pagpangita sa mga biktima sa landslide sa Davao Oriental subong man nga Pebrero.
Ini ang rason kun ngaa nag-rekomendar ang veterinarian sang Coast Guard District Southeastern Mindanao nga i-pull out na ang ido kag papahuwayon.
“From Davao Oriental, Appa was rushed to Zone One, the ground zero of the landslide in Masara village to find the landslide survivors. The dog is dead tired already. The veterinarian at the Coast Guard District Southeastern Mindanao has recommended for the dog to be pulled out from the search and rescue mission for a much needed rest,” suno kay Rimando.
Kilala si Appa nga amo ang nakakita sa tatlo ka tuig nga bata nga babayi nga masobra 60 ka oras nga na-trap bangud natiphagan sang duta. Ang bata ang ginakabig nga milagro nga nakaluwas sa amo nga insidente.
Sa report sang Coast Guard District Southeastern Mindanao, may tatlo man ka bangkay nga nakit-an si Appa.
“In the ongoing efforts, Appa’s keen sense of smell and agility in traversing the terrain have been invaluable,” suno sa statement sang PCG.
Ginpasalamatan man ang iban nga rescue dogs nga amo ang nagbulig sa search and rescue lakip sanday Britney, Ivy, kag Tifa nga nagbulig man agud maggiyahan ang team sa anum ka mga lokasyon kun sa diin may yara sang posible nga mga bangkay.
Lunsay sila kabahin sang Coast Guard – K9 search and rescue dogs halin sa Coast Guard District Southwestern Mindanao nga naka-base sa Zamboanga City kag Zamboanga del Sur.
Una na nga ginsiling sang otoridad nga padayon sa gihapon ang search kag retrieval team sa pagpangkutkot sa ground zero agud pangitaon ang siyam ka iban pa nga missing nga mga tawo.#
