Ginabanta 340 ka mga tawo sa 30 ka nagkalain-lain nga syudad sa Russia ang gin-detain kadungan sang ila nga mga aktibidad nga nagapakita sang pagprotesta, paglalaw, kag paghatag sang tribute kay Alexei Navalny, ang pinakamatunog nga kritiko ni Russian President Vladimir Putin.
Si Navalny, 47-anyos nga abogado, ang gulpi lamang nga nalipong samtang nga nagalakat ini sa sulod sang “Polar Wolf” Arctic penal colony kun sa diin nagatinir ini ara sa iya sentensya nga nagalawig sang tatlo ka dekada.
Ginpahayag nga sang nag-abot ang iloy ni Navalny sa presuhan, ginsilingan ini nga napatay ang iya bata bangud sa ‘sudden death syndrome’. Ini isa ka general term para sa cardiac syndromes nga rason sang cardiac arrest kag gulpyada nga kamatayon.
Ginsiling man sa iloy nga indi pa pag-ihatag ang lawas ni Navalny samtang nga wala pa natapos ang imbestigasyon.
Suno naman sa OVD-Info nga amo ang naga-report sang freedom of assembly sa Russia, ang pinakadamo nga gin-aresto sang Sabado ang natabo sa St Petersburg kag Moscow kun sa diin madamo gid man ang taga-suporta sang kritiko ni Putin. Ginpahayag nga 74 kag 49 ang ginpang-detain sa amo nga mga syudad.
May yara man sang nagaguwa nga footage nga nagdala ang mga tawo sang bulak kag kandila kag may nagkanta pa sang hymno samtang nagahaksanay, apang pagkatapos sang kanta, ginabanta 30 sa ila ang ginpang-aresto.
Ginakabig ang kamatayon ni Navalny nga daku nga kadulaan sang lider sa opposition ilabi na bangud naga-preparar si Putin sa eleksyon kag nagaplano nga magtinir sa iya pwesto tubtub sa 2030.
Bangud wala sang ka-klaruhan kun ano gid ang rason sang kamatayon sini kag madamo ang nagapati nga hungod ini nga ginpatay, madamo ang nag-kondenar sa hitabo lakip na ang international leaders, senior western officials kag Russian opposition figures.
Gintawag man ini sang iban nga senyales kun ano ka-brutal si Putin.
Ang G7 foreign ministers nga nagtipon sa tuigan nga Munich security conference ang nagpanawagan man sa Russia nga athagon ang mga sirkumstansya sa kamatayon ni Navalny.#
(Photo: PBS)
