Gin-akusaran sang presidente sang Brazil ang Israel nga nagahimo na sang genocide batok sa Palestinian nga mga sibilyan sa Gaza.
Sa amo nga statement ni Brazilian President Luiz Inacio Lula da Silva, ginpaanggid man sini ang ginahimo sang Israel sa ginhimo ni Adolf Hitler nga pagpangpatay sa minilyon nga mga Jews ukon ang ginatawag nga Holocaust.
“What’s happening in the Gaza Strip with the Palestinian people hasn’t happened at any other moment in history. Actually, it has happened: when Hitler decided to kill the Jews,” suno sa Brazilian president.
Pahayag pa ni Lula, indi na ini away sang mga soldado batok sa mga soldado kundi away sa tunga sang preparado nga militar batok sa makaluluoy nga mga kababainhan kag kabataan.
Matandaan nga isa si Lula sa nagkondenar sa ginhimo sang Hamas militants nga pag-atake sa southern Israel sang Oktubre 7 kag gintawag pa ini nga isa ka akto sang terorista bangud sa masobra 1,000 nga napatay kag masobra 200 nga ginpang-bihag.
Apang sang nagtimalos na ang Israel kag subong masobra 28,000 na ang nagkalamatay sa Gaza, nangin matunog man nga kritiko ang amo nga presidente.
Kasunod sang komento sang 78-anyos nga Brazilian president, nagsingkal naman ang kaakig ni Israeli Prime Minister Benjamin Netanyahu.
Ipatawag man sang Israel ang ambassador sang Brazil bangud sa ginpahayag “makahuluya” nga komento sang ila nga presidente.
Para kay Netanyahu, wala nagakaangay nga ikumparar ang natabo sa Holocaust kag sa nagakatabo subong sa Gaza kun sa diin “gina-depensahan” lamang sang Israel ang kaugalingon nga pungsod.
“The comparison between Israel to the Holocaust of the Nazis and Hitler is crossing a red line. Israel is fighting to defend itself and ensure its future until total victory and it is doing that while upholding international law,” suno sa statement ni Netanyahu.
Matandaan nga ginpakamalaot man anay ni Lula ang desisyon sang iban nga mga pungsod sa West nga untaton ang ila paghatag sang ayuda sa United Nations agency for Palestinian refugees matapos nga gin-akusaran sang Israel ang pila sa ila nga mga empleyado nga may involvement sa pagpang-atake sang Oktubre 7.
Nagpasalig man si Lula kay Palestinian prime minister Mohammad Shtayyeh nga magapadayon kag mas pasangkadon pa sang Brazil ang bulig para sa mga Palestinian civilians.#
(The Express Tribune)
