Nakabaton ang Philippine Air Force (PAF) sang ikaduha na nga C-130 cargo plane halin sa Estados Unidos sang Amerika paagi sa Excess Defense Articles Program.
Ini ang may tail No. 5157 kag gindala sang US aircrew halin sa Waco, Texas pakadto sa Clark Air Base sa Mabalacat City, Pampanga.
Suno kay Air Force public affairs office chief Col. Ma. Consuelo Castillo, ang C-130H tactical transport aircraft ang mainit gid nga gin-abi-abi sang militar kag ginsugata pa sang water cannon salute sang tapos na ang landing.
Antes sini nga C-130 aircraft, naghatag man ang US government sang una nga unit sang Enero 29, 2023 Ini nga mga eroplano ang ginalauman nga may daku nga bulig sa cargo airlift fleet, support humanitarian assistance, disaster relief operations kag iban pa nga military missions.
Natalana naman ang formal acceptance, turnover, kag blessing ceremony sa katapusan sang Pebrero ukon sa temprano nga bahin sang Marso.#
