Nagaplano ang World Health Organization (WHO) nga sayluhon ang ginabanta 140 ka mga pasyente nga stranded sa Nasser hospital sa Gaza bangud sa pahayag sang Palestinian officials nga may mga bangkay na nga nagakadunot bangud sa padayon nga pag-utod sang suplay sang kuryente sa tunga sang gyera sang Israel kag Hamas.
Suno sa organisasyon, tatlo na ka hugnat sang evacuation ang ila nga napatigayon halin sa amo nga ospital sa Khan Younis kun sa diin ang pinakaulihi amo ang 51 ka mga pasyente sang nagligad nga Myerkules.
Pahayag sang WHO, ini nga ospital nga amo ang ikaduha sa pinakadaku sa bilog nga Gaza, ang nag-untat na sa pag-function sang nagligad nga semana bangud nga ginsulod man ini sang pwersa-militar sang Israel kag ginpangkutkot pati ang mass graves bangud sa pagpati nga may Hamas militants sa amo nga ospital.
Padayon suno sa organisasyon ang ila himuon nga pagsaylo sang kritikal na kag pilason nga mga pasyente agud mas matatapan sila sa iban nga pasilidad sa south.
“The WHO will continue to try evacuation of those critically ill and critically wounded patients from the Nasser hospital to other hospitals in the south, including the field hospitals that have been established in Rafah. However it’s a very difficult and high risk mission,” pahayag ni Ayadil Saparbekov sang UN agency.
Nahibaluan nga wala sang pagkaon, medical supplies, power ukon oxygen sa amo nga ospital kag wala man nakonekta liwat sang staff ang main generator.
Una na nga ginsiling sang Israel Defense Forces (IDF) nga nagapanago ang mga militante sa sulod sang ospital kag ginasuspetsahan man nga didto ginpangtago ang lawas sang iban nga hostages. Ginpanginwala naman ini sang Hamas kag gintawag nga lunsay kabutigan.#
(Israel Defense Forces)
