Gin-anunsyo sang Estados Unidos sang Amerika nga magadagdag ini sang bag-o nga sanctions sa Iran bangud sa pagsuporta sini sa Russia sa pag-atake sa Ukraine.
Paandam pa ni National Security Council spokesman John Kirby, preparado ang Amerika nga dugangan pa ini nga sanctions pananglitan mahibaluan nga magabaligya man ang Iran sang ballistic missile kanday Russian President Vladimir Putin.
Suno kay Kirby, indi libre ang bulig sang Iran sa Russia.
“Iran is not helping Russia for free. In return for Iran’s support, Russia has been offering Tehran unprecedented defense cooperation. So in total Iran is seeking billions of dollars’ worth of military equipment from Russia,” pahayag sang opisyal.
Nahibaluan nga ginakulang na sang armas ang pwersa sang Ukraine batok sa nagsalakay nga militar sang Russia.
Labi pa ini nga nagabudlay bangud indi pa makalusot sa Kongreso sa Amerika ang ginaduso kuntani nga dugang nga bulig para sa Ukraine.
Base naman sa intelligence reports, nagdangop ang Russia sa Iran kag sa North Korea para nga makaangkon sang dugang nga mga armas kag equipment para sa ila nga militar bangud nga ginakulang naman sila sang domestic arms production.#
(ASSOCIATED PRESS | Sergei Savostyanov ©)
