Nag-resign sa posisyon si Palestinian Prime Minister Mohammad Shtayyeh nga amo ang nagapamuno lakip sa okupado nga West Bank bangud sa padayon nga kalakasan sa nasakpan nga teritoryo kag amo man ang gyera sa Gaza.
Sa resignation letter sini nga ginpasa kay Palestinian Authority President Mahmoud Abbas, ginsiling sini nga ang rason amo ang paglala sang away sa West Bank kag Jerusalem kag ang genocide kag kagutom sa Gaza Strip.
“I see that the next stage and its challenges require new governmental and political arrangements that take into account the new reality in Gaza and the need for a Palestinian-Palestinian consensus based on Palestinian unity and the extension of unity of authority over the land of Palestine,” pahayag sini.
Ginbaton ni Abbas ang resignation sang opisyal apang gin-hingyo ini nga magpabilin anay nga caretaker tubtub nga may ma-appoint nga permanente nga replacement.
Ang tikang ni Shtayyeh ang kasunod sang pag-pressure sang US kay Abbas nga i-reorganize ang Palestinian Authority (PA) kag magsugod na sa pag-establisar sang political structure nga amo ang magapamuno sa Palestinian state kasunod sang gyera.
Sa pihak nga bahin, sulit-sulit naman nga ginbasura ni Israeli Prime Minister Benjamin Netanyahu ang panawagan sang PA sa idalom ni Abbas nga amo ang magakontrol sa Palestinian state kag magpamuno sa Gaza.
Sang nagligad nga semana, ginsuportahan man sang Israeli lawmakers ang rejection ni Netanyahu sa anuman nga “unilateral” recognition sang Palestinian state.#
([Anna Szilagyi/EPA])
