Nagpaguwa na sang desisyon ang Korte Suprema sang Estados Unidos sang Amerika nga nagabali sa una nga desisyon sang korte sa Colorado nga balabagan nga mabutang ang pangalan ni anay US President Donald Trump sa Republican presidential primary ballot sa amo nga estado.
Ini nga ruling ang nagakahulugan nga wala sang bisan ano nga state ang makabalabag kay Trump, ukon sa kay bisan sin-o nga kandidato, sa presidential ballot paagi sa pag-invoke sang insurrection clause sa Constitution.
Si Trump amo ang leading contender sang Republican presidential nomination.
Matandaan nga ginpatigayon sadtong Pebrero ang hearing sa Supreme Court matapos nga una man nga nagpaguwa sang desisyon ang pinakamataas nga korte sa Colorado kun sa diin nakasaad nga indi na eligible si Trump nga makapadalagan bangud sa kahilabtanan sini sa natabo nga riot sa US capitol sang nagligad nga presidential elections.
Gin-apelar ni Trump ang amo nga desisyon sa Korte Suprema kag sandig sa argumento sang iya mga abogado, ang natabo sa Capitol sang Enero 6, 2021 ang makabig nga riot kag INDI insurrection.
Naka-angkla ang kaso sa mayor nga US Constitution clause nga Section 3 sang 14th Amendment kun sa diin gina-ban sa pagdumala sang office ang sin-o man nga nag-engage sa insurrection ukon sa rebellion.
Ang maragtason nga desisyon sang Korte Suprema ang ginpaguwa pila ka oras lamang antes ang Super Tuesday, ang adlaw sa USA kun sa diin dungan ang madamo nga mga states sa pagpatigayon sang ila nga presidential primaries kag caucuses agud madeterminar kun sin-o ang mangin presidential nominee sang Republicans nga amo naman ang makasumpong ni US President Joe Biden sa eleksyon sa Nobyembre.#
