Naghimo sang maragtas ang France bilang labing-una nga pungsod sa bilog nga kalibutan nga nagbutang sa Konstitusyon sang kinamatarong sa aborsyon.
Ini matapos nagboto ang parliamentarians agud nga islan ang 1958 constitution agud mahatagan sang “guaranteed freedom” ang mga kababainhan nga makapahulog sang bata.
Kasunod sang 780-72 nga boto nga lapaw sa three-fifths sang majority nga amo lamang ang kinahanglan agud amyendaran ang French constitution, nagtilindog ang mga mamalidha sa parliament sa Versailles agud maghugyaw sa resulta — tikang nga ginlaragway naman ni French President Emmanuel Macron bilang “French pride” nga isa man ka “universal message”.
Nahibaluan nga legal na ang abortion sa France halin pa sang 1975 apang sandig sa survey, 85% pa sang publiko ang nagahingyo nga amyendaran gid ang Konstitusyon agud nga ma-protektahan ang ini nga kinamatarong sang mga babayi.
Kasunod sang desisyon, ginpasiga ang popular nga Eiffel Tower sa Paris bilang selebrasyon kag ginbutang pa ang mensahe nga: “My Body My Choice”.
Suno sa justice minister sang pungsod, sa International Women’s Day, pormal nga igabutang sa Konstitusyon ang bag-o nga amendment paagi sa isa ka public ceremony sa Vendome Plaza sa Paris.
Isa naman ang Simbahang Katolika sa nagpamalabag sa sini nga amendment. Sa statement sang Pontifical Academy for Life — ang Vatican body nga nagatutok sa mga isyu sa bioethics — ginpahayag nga sa tion nga may yara sang universal human rights, wala dapat sang kinamatarong nga kuhaon ang kabuhi sang isa ka tawo.
Antes ang pagbinotohay sa parliament, nahibaluan nga nagpatigayon man sang conference ang mga obispo sa France agud ipahayag ang pagpamalabag sang Simbahan.#
