Kumpirmado nga napirmahan na sang mga opisyal sa Kamara ang arrest warrant nga idagdag batok sa fugitive pastor nga si Apollo Quiboloy bangud sa padayon sini nga pagbalewala sa subpoena nga gin-isyu agud kuntani tambungan ang hearing sang mga mamalidha samtang gina-diskusyunan ang violations sang TV franchise nga iya ginapanag-iyahan.
Suno kay Surigao del Sur 2nd District Rep. Johnny Pimentel, ang nagpirma sang arrest warrant amo sanday House legislative franchises committee chair Rep. Gus Tambunting kag House Secretary General Reginald Velasco.
Ihatag ini nga warrant sa House sergeant-at-arms kag retired police major general Napoleon Taas nga amo ang maga-koordinar sa Philippine National Police sa pagserbe sang warrant.
Matandaan nga gin-aprubahan na sang panel ang House Bill 9710 nga amo ang maga-revoke sang legislative franchise nga gin-isyu sang Kongreso sa Swara Sug Media Corp. nga amo ang operator sang Sonshine Media Network Inc.
Magaagi ini nga hagna sa kinaandan nga proseso sa Kamara — kinahanglan nga mapasar sa third and final reading sa House antes ini ipadala sa Senado para sa amo man nga procedure para sa concurrence sang mga senador.
Una man nga ginpahayag sang kampo ni Quiboloy nga wala siya naangot sa operasyon kag management sang amo nga network bangud nagapungko lamang siya bilang “honorary chairman”.
Una man nga ginpahayag sang legal counsel sini nga didto si Quiboloy sa Davao City, nagapangamuyo para sa “divine guidance” samtang padayon nga nagapadalagan sang ministry sa Kingdom of Jesus Christ.#
