ILOILO CITY- Gin-ako ni Presidente Ferdinand Marcos Jr. nga ginalantaw niya nga mas naglala pa ang pagpamahog sa West Philippine Sea kag may dapat ubrahon ang Pilipinas nga mas labaw sa kun ano ang ginahimo sini subong agud madepensahan ang teritoryo.
Apang wala man ini nagapati nga ang pag-invoke sa Mutual Defense Treaty sa Estados Unidos sang America ang pinakamaayo nga solusyon magluwas lang kun ang pagpamahog sang China batok sa Pilipinas ang mangin tuman na gid ka maathag.
Ang Mutual Defense Treaty isa ka defense pact nga nagaugyon sa duha ka magkaalyado nga pungsod agud buligan ang isa kag isa batok sa aggression.
Sa idalom sang Article IV sang treaty, nasaad nga ginakilala sang Pilipinas kag US nga ang armed attack sa Pacific area sa bisan sin-o sa ila nga duha ang mangin delikado sa ila tagsa ka seguridad.
Nagdeklarar man ang duha ka pungsod nga magaakto sila sa pag-atubang sa peligro santo sa ila constitutional processes.
Sa pihak sang presensya sang treaty, ginpahayag ni Marcos nga tuman man ka delikado nga panumdumon nga kun may matabo, magapangayo gilayon sang bulig sa Estados Unidos.
Pahayag ni Marcos, himuon niya ang tanan nga posible nga pamaagi agud malikawan ang sitwasyon nga maglab-ot sa giyera ang nagapadayon nga tensyon.
Sa subong, magapadayon anay ang pagpakigdayalogo sang Pilipinas agud nga maresolba ang konplikto.
