Ginpahibalo sang Malacañang nga nag-develop sang mga sintomas sang trangkaso sanday President Ferdinand “Bongbong” Marcos, Jr. kag First Lady Liza Araneta Marcos.
Ini kasunod sang ila sunod-sunod nga byahe sa luwas sang pungsod — halin sa Australia, balik sa Pilipinas, padulong sa Germany, kag sunod sa Czech Republic.
Suno sa Presidential Communications Office (PCO), estable man ang vitals sang mag-asawa nga Marcos kag naga-inom lamang sang bulong agud mapahagan-hagan ang kondisyon. Nag-abiso man ang doktor nga magpahuway anay ang duha agud madasig nga mag-ayo ang pamatyag.
Bangud sini, ginpahibalo man sang PCO nga kanselado anay ang appointments sang presidente sa masunod nga inadlaw lakip ang presidential luncheon nga i-host sang Foreign Correspondents Association of the Philippines sa Huwebes.
“The Presidential Communications Office is in constant communication with the FOCAP Board to have the event rescheduled to a future date,” kabahin sang announcement sang PCO.
Matandaan nga magluwas sa mga byahe sa luwas sang pungsod, nag-preside pa si Marcos sa meeting sang Legislative Executive Development Advisory Council, may rountable discussion sa World Economic Forum, kag nakaatubang pa kay US Secretary of State Antony Blinken para sa dinner sang nagligad nga adlaw.#
